وين رآح ضميرك؟

اليُوم حبّيت نجيبلكم موضوع لي العنوان تاعو " وين رآح ضميرك؟؟" ولي نقصدو بهاد العنوان هو الأستاذ
وبالأخص رايحة نحكي على أستاذة الجامعة لي حبسولي راسي صح،
وحسب السنوات القليلة لي عديتها في الجامعة حبيت نذكرلكم أهم المواقف
لي بقات في راسي ولي خلاتني نقول "وين رآح ضميرك؟؟ "



العام لي فات كنت نقرا عند أستاذ المقياس تاعو ساهل وعادي يعني غير حفاظة ، ( احفظ الفوتو كوبي لي يمدهالك مايتعبش روحو خاطر ) ومبعد قادر تجيب 19 عادي ( كلشي يعتمد على حفاظتك )، المهم نهار دخلت نقرا عندو اول محاضرة لقيت هاد الاستاذ يعدي علينا بالواحد وهو هاز كتابات في يدو ويقولنا " هاد الكتاب أنا لي درتو وسومتو 700 دج ( 70 ألف ) ونوعدكم كل واحد يشري هاد الكتاب نقطتو في الامتحان تكون من 17 وروح" يعني أشري الكتاب وتنجح ، أنا بقيت حايرة قلت رانا في جامعة ولا سوق؟؟ ، و مكرا فيه يعني ما حبيتش نشري هاداك الكتاب ، ونهار الامتحان رحت حافظة 100/ 100 يعني رحت معولة على نقطة عالية ،والامتحان تاني كان أسئلة مباشرة يعني خرجت من الامتحان وأنا حاطة في بالي على الأقل ندي 18، ولدرجة خرجت فرحانة كنت نقارن في ورقة الوسخ تاعي بالكراس لقيت كلشي صحيح وكانت وحدة تقرا معايا خرجت قريب تبكي نصف اجوبتها غالطة ، يعني أنا خرجت خادمة من الامتحان وهي لالا بصح الفرق بيناتنا أنو هي شرات الكتاب وأنا لالا ، ونهار لافيشاج رحت نجري فرحانة باه نشوف نقطتي ، ومع شفت في لافيشاج نلقى 10 ؟؟ صراتلي صدمة بقيت نشوف قلت بالاك الشمس ضربتني ومارانيش نشوف مليح ، بقيت نتبع بيدي على ورقة لافيشاج وصح كانت 10 ( بالاك كان حاب يمدلي أقل من 10 بصح غضتو كي كنت حافظة ) ومبعد طلعت راسي لقيت لي ما خدمتش نقطتها 17، اتخيلو معايا لافيشاج هاداك مقسوم ، جماعة لي شرات لكتاب 17 ولي ماشراوش الكتاب وخدمو في الامتحان 10 ( زعما باه مايشقيهمش للراتراباج) ولي ما شراوش لكتاب وما خدموش تحت 10، ماتفهم والو ، و المشكلة الجماعة لي زاد دخلهم للراتراباج عيطلهم قالهم مارانيش قاعد أرواحو صلحو ورقتكم بنفسكم ، درك قولولي هادا أستاذ وعندو ضمير ؟؟
اسمحولي طولت عليكم بصح نزيد نذكرلكم موقف خلاف صرالي هاد العام حبسلي مخي، عندنا استاذ يقرينا 3 أشهر على الأقل هو قرانا 3 ايام ، صدقوني يا خاوتي 3 أيام ، والمشكل الأفواج لي يقراو عندو التطبيق الصباح يقريهم عادي و الأفواج لي يقراو عندو التطبيق من ورا 12 يقولهم مارانيش قاعد ، المحاضرة لي لازم يلقي فيها درس كي العباد هو ألغاها قالنا نجيبلكم فوتو كوبي واحفظو وخلاص ( تحفظ فوتو كوبي وماعلابالكش حتى علاواه تهدر )، والمحاضرة هديك جمع فيها الأفواج كامل اتخيلو محاضرة تاع ساعة ونص يدير فيها كتر من 20 بحث ؟؟؟؟ ، وكن على الأقل يقدر قيمة البحث ، أنا نعرف أستاذ يمدلك قائمة البحوث ونتا تخير ، هو لالا يقولنا جيبو من عندكم أي بحث معليش ( حتى ولوكان ديرلو بحث على حريم السلطان يقبلو عادي )، ونهار البحث يجيب صحابو ويقعد يحكي معاهم وحنا نقدمو البحث للحيوط وزيد يقولنا من فوق "عندكم 5 دقايق تقدمو البحث وازربو غير روحو للخاتمة ما عنديش وقت" وفوق هادا يقولك أنا نحسب على طريقة الإلقاء ( واش من إلقاء؟؟ راني قريب نحكيلك قصة حياتي في البحث ونتا لاخبر وتقولي إلقاء؟؟ ) ويزيد يقولنا "ما تخافوش نقطتكم كامل تاع الامتحان راهي فوق 10 واحد ما فيكم مايدخل راتراباج خاطر عندي شغال ما نقدرش نقعد للراتراباج " ( اتخيل تمد الورقة فارغة وتنجح؟؟) ، أنا يا خاوتي مانكدبش عليكم نهار الامتحان تاعو ما كنتش حافظة خاطر مافهمت والو المقياس تاعو وماعلاباليش علاواه يحكي وأنا باه نحفظ حاجة العنوان تاعها يحكي على الجزائر وفي النص على هاواي هنا اسمحولي ندي 0 خير، صدقوني الامتحان هاداك والله ماخدمت فيه كلمة ما عرفتها ( بصح عمرتلو الورقة بالخربشات تاعي نحشم نمد الورقة فارغة ههه ) علابالكم قداه جات نقطتي في الامتحان؟؟ 14، يعني ما فهمتش واحد يزيدلك وواحد ينقصلك ، أنا نحوس على حقي برك لا تزدلي لا تنقصلي، والله حرت في الاستاذة هادو وخلي الأمور تاع التربية لي ما ذكرتهمش ( خلي البير بغطاه) ، بصح ماننكرش بلي كاين أستاذة ماشاء الله عليهم تربية وأخلاق ويحترمك كإنسان قبل ما يحترمك كطالب، المهم اسمحولي طولت عليكم وهادا هو التعليم في بلادنا واش نديرو ربي يهدينا ، وصح فطوركم